ហេតុ​អី​ខ្លាច​ខ្មោច​ តែ​ចូល​ចិត្ត​មើល​រឿង​ខ្មោច?​

អ្នក​ដែល​ចូល​ចិត្ត​មើលរឿង​ខ្មោច​ភាគ​ច្រើន​​សុទ្ធសឹង​តែជាអ្នក​ខ្លាច​ខ្មោច។​ ពេល​មើល​ម្តងៗ​ អារម្មណ៍របស់​អ្នក​ច្បាស់​ជា​​ភ័យ​ បែក​ញើស​បាត​ដៃ​ កន្រ្តាក់​ជើង​ពេលភ្លេងបុកម្តងៗ​ និង​ជួនកាល​អាច​ដល់​ថ្នាក់​ស្រែក​ និង​ គប់​របស់​របរ​ចោល​ទៀត​ក៏ថា​បាន។​ ខ្លាច​ខ្មោច​ហើយ​តែ​មើល​រឿង​ខ្មោច​ នេះ​ជាចម្ងល់​ដែល​នឹ​ង​បក​ស្រាយ​ជាមួយ​មូលហេតុខាងក្រោមនេះថាតើមកពីហេតុអ្វី៖ 

១. បន្ធូរអារម្មណ៍អវិជ្ជមាន
ទ្រឹស្តីរបស់ទស្សនវិទូជនជាតិក្រិច លោក Aristotle បង្ហាញថា មនុស្សត្រូវបានទាក់ទាញដោយរឿងរន្ធត់ គួរឲ្យខ្លាច ព្រោះរឿងទាំងនោះវាផ្តល់ឱកាសឲ្យពួកគេជម្រះអារម្មណ៍អវិជ្ជមាន ដែលជាដំណើរការមួយដែលទស្សនវិទូរូបនេះឲ្យឈ្មោះថា Catharsis។ ដូច្នេះជាមួយទ្រឹស្តីនេះ យើងអាចសន្មត់បានថា ការដែលយើងមើលរឿងរន្ធត់ សាហាវឃោរឃៅ ព្រោះតែដើម្បីបន្ធូរកំហឹង និងអារម្មណ៍មិនល្អក្នុងខ្លួន។

២. ភាពងឿងឆ្ងល់
មនុស្សយើងពូកែណាស់ខាងឆ្ងល់ ហើយតែងតែចង់ដឹងគ្រប់បែបយ៉ាង ដោយសារយើងមានខួរក្បាលដែលធ្វើការមិនឈប់និងសកម្ម។ យើងចូលចិត្តភាពតក់ស្លុត ភ្ញាក់ផ្អើល ដើម្បីបំពេញនូវរោគឆ្ងល់មើលមិនជារបស់យើង។

៣. ចូលចិត្តអារម្មណ៍រុញច្រាន

អ្នកខ្លះចូលចិត្តមើលរឿងខ្មោច ទាំងខ្លួនខ្លាចខ្មោច ដោយសារតែមានចំណូលចិត្តនូវការដែលអារម្មណ៍មានអ្វីមកទង្គិចរុញច្រាន ឬពញ្ញាក់ ដែលជាអារម្មណ៍មួយពិបាកបែងចែក។

៤. ចង់ឃើញការបញ្ចប់នៃរឿងខ្មោច
ន័យនេះចង់សំដៅទៅលើ អារម្មណ៍បន្ទាប់ពីមើលរឿងខ្មោចហើយ ដែលធ្វើឲ្យអ្នកខ្លះធូរស្រាល និងសប្បាយចិត្ត ឬមួយអាចនឹកទៅដល់អារម្មណ៍តានតឹងកំពុងមើលទៀតផង។ មូលហេតុនេះហើយដែលជំរុញអ្នកឲ្យកាន់តែចូលចិត្តមើលរឿងខ្មោចថែមទៀត ព្រោះតែអ្នកមិនចងចាំនូវភាពរន្ធត់បុករុកអារម្មណ៍ពេលកំពុងមើលនោះទេ តែជាភាពរន្ធត់បែបកម្សាន្តច្រើនជាង នេះជាការលើកឡើងរបស់សាស្រ្តាចារ្យ Glenn Sparks នៃសាកលវិទ្យាល័យPurdue ។ 

៥. ញៀននឹងអារម្មណ៍រន្ធត់

ការញឿននឹងអារម្មណ៍ភ័យរន្ធត់នេះបណ្តាលមកពីកត្តាផ្លូវចិត្ត និង ការគិតនៃខួរក្បាលរបស់មនុស្សម្នាក់ៗ។ អ្នកខ្លះគិតថា បើខ្លាចហើយ មើលធ្វើអីទៀត។ ខុសស្រលះហើយ! កាន់តែខ្លាចកាន់តែចង់ដឹង ហើយអារម្មណ៍ភ័យរន្ធត់ពេលដែលរឿងខ្មោចកំពុងលេង ធ្វើឲ្យអ្នកមានអារម្មណ៍ចូលចិត្តខ្លាំងរហូតដល់ញៀន។

អត្ថបទដោយ៖ សន ឆវីវតី
ប្រភពអត្ថបទ៖ Znews