៧​ចំណុច​​ជួយ​​បង្កើត​​ទម្លាប់​​ក្នុង​​ការ​អាន​​

ការអានជារឿងសំខាន់សម្រាប់ការសិក្សា ការងារ ការសម្រចចិត្តនិងចំណេះដឹងផ្សេងៗពីរបស់ឬព្រឹត្តិការណ៍ជុំវិញខ្លួន។ ប៉ុន្តែមនុស្សមួយចំនួនមិនសូវមានទម្លាប់ក្នុងការអាននោះទេ ដូចនេះដើម្បីបណ្តុះស្មារតីក្នុងការអានជាប្រចាំអ្នកគប្បីអនុវត្តចំណុចទាំង៧ខាងក្រោម៖

ប្រភព៖ EL HUFFINGTON POST

១. កំណត់ពេលវេលា

កំណត់ពេលវេលាសម្រាប់អានប្រចាំថ្ងៃ​ឲ្យបានយ៉ាងហោចណាស់៥ទៅ១០នាទី។ ហើយអ្នកត្រូវតាំងចិត្តថា ទោះជាយ៉ាងណាក៏ដោយក៏អ្នកត្រូវចំណាយពេលប្រាំទៅដប់នាទីនោះដើម្បីអានសៀវភៅដែរ។

២. យកសៀវភៅជាប់ខ្លួនជានិច្ច

ពេលអ្នកមានពេលទំនេរ​ ឬត្រូវចំណាយពេលរង់ចាំនរណាម្នាក់ឬអ្វីមួយនោះ អ្នកអាចទាញយកសៀវភៅដែលមានជាប់ខ្លួនស្រាប់យកមកអាន។

៣. ធ្វើបញ្ជី

ព្យាយាមកត់ត្រាទុកនូវសៀវភៅល្អនានាដែលអ្នកចង់អាន។ គួរកត់ចំណងជើងសៀវភៅនៅរាល់ពេលដែលអ្នកបានលឺឬដឹងពីសៀវភៅល្អៗ។

៤. រកកន្លែងស្ងប់ស្ងាត់

រកកន្លែងស្ងប់ស្ងាត់មួយនៅក្នុងផ្ទះឬទីណាក៏ដោយដែលអ្នកអាចអានសៀវភៅម្នាក់ឯងដោយគ្មានការរំខាន។

៥. កាត់បន្ថយការមើលទូរទស្សន៍ឬប្រើប្រាស់អ៊ីនធើណេត

មនុស្សភាគច្រើនអាចមានផលវិបាកក្នុងការកាត់បន្ថយវា តែអ្នកគួរព្យាយាមបន្តិចម្តងៗដោយសាររាល់វិនាទីដែលអ្នកមិនមើលទូរទស្សន៍ឬមិនប្រើប្រាស់អ៊ីនធើណេត អ្នកអាចយកពេលទាំងនោះមកអានសៀវភៅ។

៦. អានសៀវភៅដែលអ្នកចូលចិត្តនិងធ្វើឲ្យអ្នករីករាយ

ចាប់ផ្តើមជាមួយនឹងការអានសៀវភៅដែលធ្វើឲ្យអ្នកសប្បាយរីករាយនិងមានចំណាប់អារម្មណ៍ក្នុងការអាន ព្រោះវានិងជំរុញទឹកចិត្តអ្នកឲ្យចង់បន្តការអានកាន់តែច្រើន។

៧. កំណត់គោលដៅ

កំណត់ឲ្យច្បាស់ថា​ក្នុងមួយសប្តាហ៍ឬមួយខែអ្នកត្រូវអានសៀវភៅឲ្យចប់ប៉ុន្មានក្បាល ហើយព្យាយាមសំរេចគោលដៅដែលបានកំណត់នោះ។ គួរកំណត់ចំនួនសៀវភៅដែលអ្នកគិតថាអ្នកនឹងធ្វើបានដើម្បីអោយអ្នកមានទឹកចិត្តក្នុងការអានបន្តទៀត៕

អត្ថបទដោយ៖ ជី បូណ៌មី

ប្រភព៖ Life Hacks