៧យ៉ាងបញ្ជាក់ថា​ហេតុអ្វី​យើង​បាត់​បង់​មិត្ត​ភក្តិ

ផ្នែកមួយដែលអាក្រក់បំផុតនៅក្នុងពេលដែលយើងរីកលូតលាស់ឡើងនោះ គឺការបាត់បង់មិត្តភក្តិម្ដងមួយៗ ទោះបីជាស្និទ្ធស្នាលនឹងគ្នាខ្លាំងយ៉ាងណាក៏ដោយ។ នៅពេលដែលយើងឈានចូលដល់វ័យជំទង់ ពួកគេនឹងចាប់ផ្ដើមបាត់ទៅដូចគ្នា ហើយខាងក្រោមនេះគឺជាហេតុផលដែលអ្នកគួរតែដឹង៖




១. កាលៈទេសៈត្រូវបានផ្លាស់ប្ដូរ
នៅពេលដែលអ្នកធំឡើង អ្នកចាប់ផ្ដើមត្រូវចំណាយពេលវេលាច្រើនជាមួយការងារផ្ទាល់ខ្លួន​និងមិនមានសូម្បីពេលវេលាសម្រាប់ជួបជុំមិត្តភក្តិ ទោះបីជាម្នាក់នោះស្និទ្ធស្នាលនឹងអ្នកខ្លាំងប៉ុណ្ណាក៏ដោយ ហើយនៅថ្ងៃណាមួយ អ្នកនឹងមានអារម្មណ៍ថា ជីវិតហាក់ដូចបាត់បង់អ្វីមួយជាក់ជាមិនខាន ប៉ុន្តែប្រហែលជាហួសពេលបាត់ទៅហើយ។

២. យើងភ្លេចគិតថាមិត្តភាពមិនអាចខ្វះការយកចិត្តទុកដាក់បាននោះទេ
ការរាប់អានមិត្តភក្តិគឺពិតជាងាយស្រួល តែបើចង់រក្សាវាអោយបានគង់វង្ស គឺពិតជាមិនងាយស្រួលនោះទេ។ ការជួបជុំគ្នាអំឡុងពេលសិក្សាគឺពិតជាមានភាពងាយស្រួល តែនៅពេលដែលពេលវាលាវំកិលទៅមុខ ពួកយើងក៏ចាប់ផ្ដើមខ្វះការយកចិត្តទុកដាក់ចំពោះមិត្តភាពទាំងនោះ​ហើយគម្លាតនៃភាពស្និទ្ធស្នាលក៏ចាប់ផ្ដើមមាន។

៣. ស្នេហា
ស្នេហាក៏ជាផ្នែកមួយដែលនាំអោយមិត្តភាពបាត់បង់ដូចគ្នា​ព្រោះនៅពេលដែលនរណាម្នាក់ចាប់ផ្ដើមមានស្នេហា​ពួកគេក៏ចាប់ផ្ដើមបែងចែកអារម្មណ៍​ដែលចាត់ទុកមិត្តភាពគឺជារឿងដែលត្រូវគិតបន្ទាប់ពីស្នេហារបស់ពួកគេ។

៤. នៅពេលដែលមិត្តភក្តិថ្មីឈានជើងចូលមក
នៅពេលដែលពួកគេមានមិត្តភ័ក្តថ្មី​យើងក៏ចាប់ផ្ដើមមានអារម្មណ៍ថា ពួកគេចាប់ផ្ដើមប្រែប្រួលដូចគ្នា ជួនកាលពួកគេខ្វល់និងស្និទ្ធស្នាលជាមួយមិត្តភ័ក្តថ្មីច្រើនជាងយើង ហើយបែបនេះហើយទើបនាំអោយយើងគិតថាពួកគេកាន់តែឃ្លាតឆ្ងាយទៅៗ។

៥. ការអន់ចិត្ត
ជួនកាលយើងបានខំប្រឹងច្រើនចំពោះមិត្តភាពមួយនេះ តែផលតបស្នងដែលទទួលបានគឺមិនដូចអ្វីដែលយើងរំពឹងទុក ដែលនាំអោយយើងមានអារម្មណ៍ថាគេមិនអោយតម្លៃយើងដូចដែលយើងបានធ្វើចំពោះគេនោះទេ។

៦. ការប្រឹក្សា
ក្រៅពីក្រុមគ្រួសារ គឺមិត្តភ័ក្តនេះហើយ​ដែលជាអ្នកប្រឹក្សាដល់សំខាន់តែការប្រឹក្សាចាប់ផ្ដើមបាត់បង់ យើងក៏ចាប់ផ្ដើមមានអារម្មណ៍ថា​មិនសូវមានភាពស្និតស្នាលដូចមុនដែលជាហេតុនាំអោយមិត្តភាពបានបាត់បង់ផងដែរ។

៧. ការធុញទ្រាន់
មិត្តភ័ក្តខ្លះគឺល្អចំពោះយើងនិងលេងសើចច្រើន តែភាពរញ៉េរញ៉ៃរបស់ពួកគេ​បែរជាធ្វើអោយយើងមានអារម្មណ៍ថាធុញទ្រាន់ទៅវិញ​ហើយយើងក៏ចាប់ផ្ដើមដកថយម្ដងមួយជំហានៗឆ្ងាយទៅៗ។

អត្ថបទដោយ៖ ជុំ រស្មី
ហាមដាច់ខាតការយក​អត្ថបទនេះដោយគ្មានការអនុញាតិ បើលោក លោកស្រីត្រូវការអត្ថបទសូមទំនាក់ទំនង 010 666 520