តោះ​មក​សិក្សា​វេយ្យាករណ៍​ខ្មែរ​អំពី​ វណ្ណ​យុត្តិ និង​ ខណ្ឌ​សញ្ញា​ ទាំង​អស់​គ្នា!​

ដោយសារតែមានការស្នើសុំជាច្រើនអំពីវេយ្យាករណ៍ខ្មែរ ថ្ងៃនេះពួកយើងក៏សូមបង្ហាញលោកអ្នកអំពីចំណេះដឹងមួយចំនួនដែលទាក់ទងទៅនិង វណ្ណយុត្តិ និង និយមន័យរបស់វា។

វណ្ណយុត្តិ​គឺ​ជា​សញ្ញា​ទាំង​ឡាយ​ដែល​បង្កើត​ឡើង ដើម្បី​កែ​ប្រែ​ ផ្តួល​សំឡេង​ព្យញ្ជនៈ ឬ​ពាក្យ​ពេចន៍​ខ្លះ ឲ្យ​សម​ស្រប​ទៅ​តាម​តម្រូវ​ការ​ប្រើ​ប្រាស់ ​ក្នុង​ភាសា​ខ្មែរ ។ មិន​តែ​ប៉ុណ្ណោះ​ សញ្ញា​ទាំង​នេះ ក៏​អាច​ជួយ​បំប្លែង​​សំឡេង​នៃ​ពាក្យ​ខ្លះ ដែល​មាន​ប្រភព​មក​ពី​ភាសា​បាលី​ ឬ​សំស្ក្រឹត​ផង​ដែរ ។

វណ្ណយុត្តិ​ទាំង​ឡាយ​ចែក​ចេញ​ជា​ពីរ​ពួក​គឺ ៖

ក/ វណ្ណយុត្តិ​ដែល​បន្ថែម​លើ​ព្យញ្ជនៈ ដើម្បី​លម្អៀង​ស័ព្ទ​ឲ្យ​ខ្លី​ឲ្យ​មាន​សូរ​ផ្សេង​ ឲ្យ​ប្លែក​ពី​សំឡេង​ដើម (Signes diacritiques) ។

ខ/ វណ្ណយុត្តិ​ ដែល​ប្រើ​ជា​មួយ​នឹង​ពាក្យ​ ក្នុង​ឃ្លា​ប្រកប ដើម្បី​កាត់​ឃ្លា​ជា​ប្រយោគ​ជា​សង្កាត់ ដើម្បី​សម្គាល់​ន័យ​សេចក្តី​ផ្សេងៗ​ ។ វណ្ណយុត្តិ​ពួក​នេះ​ហៅ​ថា “ ខណ្ឌសញ្ញា ”( Signe de ponctuation ) ។

វណ្ណយុត្តិមានចំនួន ១២ ដែលមានដូចជា៖
១មូសិកទន្ត​ ឬ​ធ្មេញ​កណ្តុរ " ៉ "
២ត្រីស័ព្ទ ( ៊)
៣រស្សសញ្ញា​ ឬ​បន្តក់ (់)
៤សំយោគ​សញ្ញា រឺផាត់លើ (័)
៥របាទ (៌)
៦អស្តា (៏)
៧ទណ្ឌឃាត ឬ​បដិសេធ (៍)
៨វិសជ៌នី ឬរះមុខ (ះ)
៩យុគលពិន្ទុ ឬចុចពីរ (ៈ)
១០រជ្ជុស​ញ្ញា ឬ​សហសញ្ញា (-)
១១កាក​បាទ ឬ​ជើង​ក្អែក (៎)
១២លេខ​ទោ (ៗ)

ខណ្ឌសញ្ញា គឺជាសញ្ញាមានរូបភាពប្លែកៗ សម្រាប់ប្រើក្នុងការសរសេរអត្ថបទផ្សេងៗ ដើម្បីសម្គាល់លក្ខណៈទម្រង់បែបបទដែលជាលំនាំឲ្យងាយយល់ ឲ្យអានបានត្រឹមត្រូវ។
ខណ្ឌសញ្ញាមានចំនួន ១៦ ដែលមានដូចជា៖

ក្បៀស ឬ កណ្ដក់សញ្ញា (,)
ទ្វិពន្ទលេខ ឬ ចំណុចពីរគូស (៖)
បុច្ឆនសញ្ញា (?)
ឧទានសញ្ញា (!)
អញ្ញប្រកាស ( "..." )
អព្ភន្តរសញ្ញា ( ់...់ )
មច្ឆសញ្ញា ឬ ពងត្រី (...)
វង់ក្រចក ឬ នខសញ្ញា ( )
វង់ដង្កៀប [...]
វ៉ាត់ ឬ ឃ្នាប {...}
បេយ្យលៈ ឬ លៈ (។ល។)
ខណ្ឌ (។)
ខណ្ឌចប់ (៕)
អាទិសង្កត់ (.)
កុក្កដនេត្រ ឬ ភ្នែកមាន់ ( ‍‌៙ )
ខណ្ឌបរិយោសាន ឬ គោមូត្រ (៚)

សម្រាប់អត្ថន័យអំពីវណ្ណយុត្តិនីមួយៗយើងនិងបង្ហាញលោកអ្នកនៅក្នុងអត្ថបទក្រោយទៀត។

អត្ថបទដោយ៖ ជុំ រស្មី

(ហាមដាច់ខាតការយក​អត្ថបទនេះដោយគ្មានការអនុញាតិ បើលោក លោកស្រីត្រូវការអត្ថបទសូមទំនាក់ទំនង 010 666 52)