កុំ​ចាំ​ដល់​មាន​បញ្ហា!​ ការពារ​កែវ​ភ្នែក​របស់​អ្នក​ជាមួយ​វិធី​ទាំង​នេះ!​

ភ្នែក​គឺ​ជា​ជិវិត​របស់អ្នក ហើយ​វា​ពិត​​​ជាសំខាន់​ណាស់​សម្រាប់​ការ​រស់​នៅ​ប្រចាំ​ថ្ងៃ​។ អ្នក​​ប្រើ​ប្រាស់​វា​សម្រាប់​មើល​​អ្វី​គ្រប់យ៉ាង​និង​គ្រប់​ពេល​វេលា​​ក្នុង​ជីវិត​របស់​អ្នក តែជួន​កាល​អ្នក​មិន​បាន​យក​ចិត្ត​ទុក​ដាក់អំពីវា ​ថា​ត្រូវ​ធ្វើ​យ៉ាង​ណា​ការពារ​វា​ឲ្យ​បានទេ។ ខាង​ក្រោម​នេះ​ជា​វីធី​សាស្ត្រ​មួយ​ចំនួន​ជួយ​សុខភាព​ភ្នែក។

1. ញ៉ាំ​អាហារ​ឲ្យ​បាន​ត្រឹម​ត្រូវ
ក្នុង​ការ​ការពារ​ភ្នែក​របស់​អ្នក ​ដំបូង​គឺ​ត្រូវ​គិត​ពី​អាហារ​ជា​មុន។ អ្នក​ត្រូវ​បរិភោគ​អាហារ​ល្អសម្រាប់​ភ្នែក​ដែល​​មាន​ដូច​ជា ត្រី (ត្រី​សាម៉ុង ត្រី​ថូនា និង​ត្រី​សំបូរ​ខ្លាញ់ដទៃ​ទៀត) ផ្លែ​ឈើ​ឬ​ទឹក​ផ្លែ​ឈើ​ក៏​បាន បន្លែ​ពណ៌​បៃតងនិង​បន្លៃ​លឿង​ ស៊ុត គ្រាប់​ធញ្ញជាតិ សាច់​ជ្រូក...។

2. បញ្ឈប់​ការ​ជក់​បារី
ការ​ជក់​បារី​បាន​​បំផ្លាញ​​សរសៃរ​ប្រសាទ​អុបទិច​របស់​ភ្នែក ហើយ​ធ្វើ​ឲ្យភ្នែក​មាន​គំហើញ​មិន​សូវ​ច្បាស់។ បើ​សិន​ជា​អ្នក​ធ្លាប់​មាន​បទ​ពិសោធ​ផ្តាច់​ជក់​បារី​មិន​បាន អ្នក​គួរ​បន្ថយ​វា​បន្តិច​ម្តង​ៗ​ហើយ​ឈប់​ជក់​ពីរ​បី​ដង​ទៅ​ប្រហែល​អាច​បាន​ហើយ។ ព្យាយាម​បន្ត​ទៀត។

3. ពាក់​វែន​តា​ការពារ​កម្តៅ​ថ្ងៃ
វែន​តា​ការពារ​ពន្លឺ​ព្រះ​អាទិត្យ​ដែល​ត្រឹម​ត្រូវ​អាច​​ការពារ​ភ្នែក​របស់​អ្នក​ពី​កាំ​រស្មី​UV បាន។ កាល​ណាភ្នែក​ទទួល​ការ​ប៉ះ​ពាល់​ពី​កាំ​រស្មី​នេះ គឺ​វា​ធ្វើ​ឲ្យ​គេ​ព្រិល​ភ្នែក ឬ​មើល​អ្វី​មិន​សូវ​ច្បាស់។ ទោះ​បី​សម្រាប់អ្នក​ប្រើ​ Contact lens ហើយ​ក៏​គួរ​តែ​ពាក់​វែន​តា​ការ​ពារ​ពី​ក្រៅ​ទៀត។

4. ប្រើ​របស់​ការពារ​ភ្នែក​ឲ្យ​បាន​ត្រឹម​​ត្រូវ
បើ​សិន​អ្នក​ធ្វើ​ការ​នៅ​កន្លែង​អាច​មាន​គ្រោះ​ថ្នាក់ ឬ​កន្លែង​មាន​ខ្យល់​ខ្លាំង អ្នក​គួរ​តែ​ប្រើ​វែនតា​ការពារ​ភ្នែក​ឲ្យ​បាន​ត្រឹម​ត្រូវ​និង​គ្រប់​ពេល។ ជួន​កាល​ការ​លេង​កីឡាដូច​ជា​ស្គី​ទឹក​កក ​ក៏​អាច​នាំ​ឲ្យ​ប៉ះ​ពាល់​ដល់​ភ្នែក​ដែរ ហើយ​ការ​ដែល​ល្អ​ត្រូវ​ពាក់​​មួក​ការពារ​មុខ​ព្រម​ទាំង​ពាក់​អ្វី​ការពារ​ភ្នែក​កុំ​ឲ្យ​ចាំង​ជាដើម។

5. មើល​ឲ្យ​ឆ្ងាយ​ពី​កញ្ចក់​កុំព្យូទ័រ
បើ​អ្នក​ចំណាយ​ពេល​យូរ​គ្រាន់​តែ​សំលឹង​ទៅ​កញ្ចក់​កុំព្យូទ័រ វា​អាច​ធ្វើ​ឲ្យ​ ភ្នែក​របស់​អ្នក​បាត់បង់​ថាមពល មើល​ឃើញ​ព្រឹលភ្នែក មាន​បញ្ហា​មើល​ឆ្ងាយ​​ឃើញ​មិន​ច្បាស់ ភ្នែក​បាត់បង់​សំណើម ឈឺក្បាល អាច​ចុក​ស្មារ ក ជាដើម។


6. ជួប​ពេទ្យ​ភ្នែក​​ឲ្យ​បាន​ទៀង​ទាត់
នៅ​ពេល​ជួប​អ្នក​ជំនាញអាច​ធ្វើ​ឲ្យ​មនុស្ស​មាន​ការ​ទុក​ចិត្ត​ជាង​ការ​ស្មាន​យក។ នៅ​ទីនោះ​ គេ​អាច​ទទួល​បាន​ពត៌មាន​បន្ថែម​អំពី​សុខភាព​ភ្នែក​របស់​គេ ហើយ​បាន​តាមដាន​ជាប់​រហូត ដែល​គេអាច​និយាយ​បាន​ថា​គេ​និង​អាច​មាន​សុខភាព​ភ្នែក​ល្អ។

ប្រភព៖  Webmd, good eye sight 

ដោយ៖ ហ៊ាង សុគន្ធារី

(ហាមដាច់ខាតការយក​អត្ថបទនេះដោយគ្មានការអនុញាតិ បើលោក លោកស្រីត្រូវការអត្ថបទសូមទំនាក់ទំនង 010 666 520)