ងងុយ​គេង​ក្នុង​​ថ្នាក់​​ជា​ប្រចាំ​មែន​ទេ?​ ធ្វើ​ម៉េច​ទើប​កម្ចាត់​វា​ចោល​បាន​ទៅ?​

ការ​អង្គុយ​ក្នុង​ថ្នាក់​ ស្តាប់​គ្រូ​ពន្យល់​មេរៀន​មិន​មែន​ជា​ការ​ងាយ​ទេ។ ជួន​កាល​ពេល​ដែល​មេរៀនដែល​គ្រូ​កំពុង​ពន្យល់​នៅ​ក្នុង​ថ្នាក់ ចាប់​ផ្តើម​ច្រើន​ឡើង​ៗ ហើយ​កាន់​តែ​គួរ​ឲ្យ​ធុញ​ទ្រាន់​ទៀត​នោះ សិស្ស​ងាយ​ស្រួល​ក្នុង​ការ​ងងុយ​គេង​ណាស់។ មាន​ពេល​ខ្លះ ក៏​មាន​សិស្ស​គេង​លក់​ក្នុង​ថ្នាក់​មិន​ដឹង​ខ្លួន​ទៀត​ផង។ ដោយ​ហេតុ​នេះ ដើម្បី​សម្រួល​ដល់​ការ​សិក្សា​របស់​សិស្ស ក្នុង​អត្ថបទ​មួយ​នេះ អ្នក​នឹង​ទទួល​បាន​វិធី​សាស្ត្រ​ខ្លះ​ៗ​ ធ្វើ​យ៉ាង​ណា​ឲ្យ​អ្នក​មិន​ងងុយ​គេង និង កាន់​តែ​អាច​ផ្តោត​លើ​មេរៀន​បាន​កាន់​តែ​ខ្លាំង​ទៀត​ផង។

1. ព្យាយាម​ចូល​រួមឲ្យ​សកម្ម​ក្នុង​ថ្នាក់
បើ​សិនជាអ្នក​ចូលរួម និង សកម្ម​នៅ​ក្នុង​ម៉ោង​រៀន អ្នក​នឹង​មិន​មាន​អារម្មណ៍​ងងុយ​ទៀត​ទេ។ អ្នក​គួរ​ចាប់​ផ្តើម​ដោយ​ការស្តាប់​ដោយ​យក​ចិត្ត​ទុក​ដាក់ គិត​ពី​អ្វីដែល​អ្នក​បាន​ឮនោះ រួច​ហើយ​ក៍​ព្យាយាម​លើក​ដៃ​ឲ្យ​យោបល់​ និង​សួរ​សំនួរ​ផង។ ក្រៅពី​នេះ អ្នក​គួរ​កត់​ត្រាពី​​អ្វីដែល​បានឮផង ហើយ​វាជា​សកម្មភាពរាងកាយដែល​ធ្វើឲ្យ​អ្នក​មិនងងុយ​ផង។ សកម្មភាព​ទាំងនេះអាច​ជួយ​ឲ្យ​អ្នក​មាន​អារម្មណ៍ថា​មាន​កម្លាំង​រៀន​បាន​មួយ​កម្រិត។


2. ផឹក​ទឹក​ត្រជាក់​ៗ​មួយ​កែវ
ជួន​កាល​អ្នក​អាច​ងងុយ​គេង​ ព្រោះ​អ្នក​មិន​សូវ​មាន​ជាតិ​ទឹក​ក្នុង​ខ្លួន។ ផឹក​ទឹក​បន្តិច​ហើយ​ក៏​លុប​មុខ​ផង នោះ​អ្នក​នឹង​អាច​មាន​អារម្មណ៍​ស្រស់​ថ្លា​វិញ​បាន​ខ្លះ​ហើយ។ ក្រៅពីនេះ អ្នក​គួរ​ញ៉ាំទឹក​ឲ្យ​បាន​ច្រើន​ផង​ដែរ​ក្នុង​មួយ​ថ្ងៃ​ៗ ព្រោះវា​នឹង​ធ្វើ​ឲ្យ​អ្នកអាច​រក្សា​ថាមពល​និង​ភាពស្រស់​ថ្លា​បាន​យូរ ពេញ​មួយ​ថ្ងៃ។ 

3. ចៀសវាង​ការ​អង្គុយ​ដែល​អាច​ឲ្យ​អ្នក​ងាយ​ងងុយ​គេង
ការ​អង្គុយ​មួយ​ចំនួន​អាច​ធ្វើឲ្យ​អ្នក​ងងុយ​គេង​ឆាប់​រហ័ស ហើយ​ក៏​មាន​អាកប្បកិរិយា​មួយ​ចំនួន​ដែល​ធ្វើ​ឲ្យ​មិន​ងងុយ​ដែរ។ បើ​អ្នក​អង្គុយ​ត្រង់​ខ្លួន និង មាន​លក្ខណៈ​យក​ចិត្ត​ទុក​ដាក់​បន្តិច អ្នក​នឹង​មិន​ងាយ​ចង់​គេង​ទេ។ អ្នក​គួរ​ជៀស​វាង​អង្គុយផ្អែក​ខ្លួន​ទៅ​កៅអី​ខ្លាំង​ពេក មិន​យក​ដៃ​ទ្រក្បាល ហើយ​ជា​ពិសេស​កុំឱន​មុខ​ទៅ​តុ​តែ​ម្តង ព្រោះអ្នក​អាច​គេង​លក់​តែ​ម្តង។


4. ទំពា​ស្ករ​កៅស៊ូ
ក្លិន​និង​រស់ជាតិ​ស្ក​រកៅស៊ូ​អាច​ជួយ​ឲ្យ​អ្នក​មាន​អារម្មណ៍​ល្អ ព្រម​ទាំង​ខួរក្បាល​ស្រស់​ថ្លា​ទៀត​ផង។ បើ​សិន​ជា​ថ្នាក់រៀន​របស់​អ្នក​អនុញ្ញាត​ឲ្យ​អ្នក​ទំពារ​ស្ក​កៅស៊ូ​បាន​មែន កុំ​ខ្លាច​នឹង​ធ្វើ​អី។


5. ក្រោក​ឡើង​ហើយ​ដើរ​ចេញ​ទៅ​ក្រៅ​បន្តិចឬទៅ​បន្ទប់​ទឹក
ការ​ក្រោក​ឡើង​ពី​កៅអី​ហើយ​ដើរ​បាន​បន្តិច​ពិត​ជា​អាច​ជួយ​អ្នក​បាន​ច្រើន ជា​ពិសេស​ពេល​មាន​អារម្មណ៍​អស់​កម្លាំង​ខ្លាំង។ ដើរ​ទៅ​បន្ទប់​ទឹក ឬ​ចេញ​ទៅ​យក​ខ្យល់​អាកាស​ខាង​ក្រៅ​បាន​១ឬ២​នាទី​ នោះ​អ្នក​នឹង​មាន​អារម្មណ៍​ល្អ​ហើយ។​


6. ព្យាយាម​បើក​ភ្នែក ហើយ​ក៏​មើល​ទៅ​អ្នក​រាល់​គ្នា​ក្នុង​ថ្នាក់
នេះ​ក៏​ជា​វិធី​មួយ​ទៀត​ដែល​អាច​ជួយ​ឲ្យ​អ្នក​ស្វាង​ពី​គេង​បាន​ដែរ។ នៅ​ពេល​ប្រឹង​បើក​ភ្នែក អ្នក​មាន​អារម្មណ៍​មួយ​ដូច​ជា​ស្រលះ​មុខ​មាត់ ហើយ​បើ​ងាក​ទៅ​មើល​គេ​ឯង​ទៀតនោះ គឺ​នាំ​ឲ្យ​កាន់​តែ​ដឹង​ខ្លួន​ឡើង។


7. ញ៉ាំអាហារពេល​ព្រឹក​ឲ្យ​បាន​គ្រប់​គ្រាន់
មួយ​ទៀត ដើម្បីការពារ​មិន​ឲ្យ​ងងុយក្នុង​ថ្នាក់ ការ​សំខាន់​មុន​នោះ​ គឺ​ញ៉ាំ​អាហរ​ឲ្យ​បានគ្រប់​គ្រាន់ ជា​ពិសេស​អាហារ​ពេល​ព្រឹក។ អាហារ​អាច​ជួយ​ឲ្យ​អ្នក​មាន​កម្លាំង និង​ថាម​ពល​ក្នុង​ការ​គិត​និង​បំពេញ​ការងារ។ ការ​ញ៉ាំអាហារ​ដែល​មាន​សារជាតិ​ចិញ្ចឹម​គ្រប់​គ្រាន់​ធ្វើ​ឲ្យ​ខួរក្បាលរបស់​អ្នក​ធ្វើ​ការ​បាន​ល្អ រហ័ស និង​មិន​ងាយ​អស់​កម្លាំង។ អ្នក​ត្រូវ​គិត​គូរ​ឲ្យ​បាន​ល្អ​ពី​សុខភាព។


ដោយ៖ ហ៊ាង សុគន្ធារី​
ប្រភព៖ Wikihow