តើការខ្វាយខ្វល់ពីរូបរាងនឹងប៉ះពាល់ដល់សុខភាពផ្លូវចិត្តអ្នកដូចម្តេចខ្លះ?
Loading...
រូបរាង និង សម្រស់ បានក្លាយជាបញ្ហាចោទមួយនៅក្នុងសង្គមសព្វថ្ងៃ
ជាពិសេសសង្គមក្មេងវ័យជំទង់។ សព្វថ្ងៃ ស្តង់ដារសម្រស់បាន
និងកំពុងតែទាមទារឲ្យយុវវ័យភាគច្រើនដើរតាម។
អ្នកខ្លះមានអារម្មណ៍ថា ខ្លួនឯងធាត់ពេក មិនស្លីម មានភ្នែកតូចពេក
ឬមានច្រមុះមិនស្អាត ស្បែកមិនស មិនខ្ពស់ ឬ មុខមិនរលោង ឬ
មានសុដន់មិនស្អាតជាដើម។
បើមនុស្សប្រុសវិញគឺខំប្រឹងធ្វើយ៉ាងណាឲ្យខ្ពស់ មានសាច់ដុំ...។
រាល់ព្រឹក អ្នកខ្លះក្រោកពីគេង មើលខ្លួនឯងក្នុងកញ្ចក់ ហើយក៍ចាប់ផ្តើមមិនពេញចិត្តរូបរាងខ្លួនឯង ពិបាកចិត្ត និង មានអារម្មណ៍រវើរវាយ។ អ្នកខ្លះក៏ត្រូវបានអ្នកនៅជុំវិញខ្លួនបង្អាប់ថាមិនស្អាត ហើយក៏ចាប់ផ្តើមតូចចិត្ត ចាប់ផ្តើមចង់កែប្រែរូបរាងខ្លួនឯងភ្លាម។ រឿងទាំងអស់នេះបានកើតឡើងមិនតិចទេចំពោះយុវវ័យឈាមរាវ និង ក្មេងជំទង់នៅក្នុងវ័យលូតលាស់។ ពួកគេជាក្រុមមនុស្សដែលងាយរងគ្រោះផ្លួវចិត្តបំផុត។
ការសិក្សារបស់អ្នកស្រាវជ្រាវមួយចំនួនកន្លងមក បង្ហាញថា មនុស្សស្រី ៨ ក្នុងចំណោម ១០ នាក់ មិនពេញចិត្តនឹងរូបរាង និង សម្រស់របស់ពួកគេ។ តើអ្នកធ្លាប់មានអារម្មណ៍បែបនោះទេ? បើធ្លាប់ តើអ្នកសង្កេតឃើញថាវាបានប៉ះពាល់អ្វីខ្លះដល់ផ្លូវចិត្តរបស់អ្នក?
ការសិក្សារបស់ Bradley Hospital and Brown Medical School បានឲ្យដឹងថា យុវជនភាគច្រើន មិនពេញចិត្តចំពោះរូបរាង ទម្រង់មុខ ទំងន់ និង រាងខ្លួនឯង។ អ្នកទាំងនោះ ប្រឈមខ្ពស់ទៅនឹង ភាពតានតឹងផ្លូវចិត្ត និង ការព្រួយបារម្ភលើសកំរិត។ ដំបូង នៅពេលដែលពួកគេចាប់ផ្តើមគិត និង មិនសប្បាយចិត្តនឹងរូបរាងរបស់ខ្លួន ពួកគេនឹងមានអារម្មណ៍ពិបាកចិត្ត និងអត់ចិត្តចំពោះខ្លួនឯង។ អារម្មណ៍ទាំងអស់នោះ នឹងក្លាយជាធ្ងន់ធ្ងរទៅៗ ហើយក៏អាចវិវត្តន៍ទៅរកជំងឺផ្លូវចិត្ត។ គេគិតច្រើន ចង់ធ្វើយ៉ាងណាដើម្បីកែប្រែរូបរាងរបស់ខ្លួន ហើយក៏ឈានទៅដល់ការសាកល្បងទម្លាប់ផ្សេងៗដែលមិនធ្លាប់ធ្វើពីមុនមក ដូចជាញ៉ាំអាហារមិនបានត្រឹមត្រូវជាដើម។
ការសិក្សាផ្សេងទៀតក៏បានលើកឡើងដែរថា ការមិនពេញចិត្តលើរូបរាងខ្លួនឯង បានធ្វើឲ្យយុវជនមិនសូវមានទំនុកចិត្តលើខ្លួនឯង។ ឧទាហរណ៍ មនុស្សស្រីតែងតែជាអ្នកដែលចង់បានការចាប់អារម្មណ៍ពីមនុស្សផងគ្នា ពេលទៅដើរលេង ឬ ទៅជប់លៀងគឺតែងតែចង់ធ្វើខ្លួនឯងស្អាត លេចធ្លោ។ តែនៅពេលដែលមិនពេញចិត្តរូបរាងខ្លួនឯងបែបនេះ គេចាប់ផ្តើមមានអារម្មណ៍បារម្ភ ស្ទាក់ស្ទើរ ក្នុងការចូលរួម ការបង្ហាញខ្លួន។ គេចាប់ផ្តើមខ្លាចពីពាក្យគេថា ដោយមិនជឿជាក់លើខ្លួនឯង។
ទាំងអស់នេះ គ្រាន់តែជាមួយផ្នែកតូចដែលទាក់ទងជាមួយ ស្តង់ដារសម្រស់ និង ភាពស្រស់ស្អាត របស់មនុស្សក្នុងយុគសម័យនេះទេ។ វាបានធ្វើឲ្យមនុស្សកាន់តែគិត ខ្វល់ខ្វាយ និងជួនកាលអាចឈានដល់ជំងឺធ្លាក់ទឹកចិត្ត បាត់បង់ភាពជឿជាក់ ហើយ មានច្រើនទៀត។
ហេតុនេះ តើយុវវ័យត្រូវធ្វើយ៉ាងណាបន្តទៀត? តើពួកគេគួរតែឈប់គិតពីរឿងសម្រស់ឬយ៉ាងណា? សូមផ្តល់យោបល់ខ្លះៗតាមរយៈ comment ខាងក្រោមផង។
ដោយ៖ ហ៊ាង សុគន្ធារី
No comments