រៀនមុនប្រលងបែបណាឲ្យមានប្រសិទ្ធភាព ជាពិសេសប្រលងបាក់ឌុប
Loading...
1. រៀបចំកាលវិភាគរៀនឲ្យបានត្រឹមត្រូវ និង ទៀងទាត់
ពិតណាស់ វិញ្ញាសាប្រលងបាក់ឌុបមានច្រើន ទាំងផ្នែក សង្គម និង វិទ្យាសាស្ត្រ។ សិស្សត្រូវចេះចាំឲ្យច្បាស់ ទាំងមុខវិជ្ជាមេរៀន និង មុខវិជ្ជាលំហាត់។ សិស្សគួរបែងចែកពេលវេលារៀនឲ្យបានច្បាស់លាស់ និង ទៀងទាត់សម្រាប់មុខវិជ្ជាមួយៗ។ អ្នកគួរដាក់ម៉ោងរៀន ១ ម៉ោងៗសម្រាប់មុខវិជ្ជាមួយៗ ក្នុងពេលដែលទំនេរឬពេលយប់។ បើអ្នកកំណត់ម៉ោងណាសម្រាប់មុខវិជ្ជាណា អ្នកគួររៀនបែបនោះរាល់ថ្ងៃ ព្រោះវាអាចជួយឲ្យខូរក្បាលស្របបានល្អនឹងពេលវេលារៀន។
2. គូសចំណាំ
មុនពេលរៀន អ្នកគួរមានកំណត់ត្រាមួយដែលមានបញ្ជីមេរៀនទាំងអស់ដែលអ្នកត្រូវមើល។ ក្រោយពីធ្វើបញ្ជីនេះហើយ អ្នកគួរមើលវាម្តងមួយៗ ហើយគូសវាចោលម្តងមួយៗ ពេលដែលអ្នកមើលវាហើយ និង ចេះចាំបានល្អហើយ។ ធ្វើបែបនេះធ្វើឲ្យអ្នកមើលឃើញពីលទ្ធផលដែលខ្លួនបានធ្វើហើយ ព្រមទាំងមានកម្លាំងចិត្តរៀនឲ្យអស់ទៀត។
3. មានការសម្រាក លំហែរខួរក្បាលផង
ពិតណាស់ ទោះបីអ្នកចង់បង្ខំខ្លួនឯងឲ្យរៀនប៉ុណ្ណា អ្នកត្រូវតែឲ្យពេលដល់ខួរក្បាលរបស់អ្នកផង។ អ្នកគួរបែងចែកពេលបន្តិចនៅចន្លោះម៉ោងរៀនមួយៗសម្រាប់សម្រាកផង ដូចជា ៥ ទៅ ១០ នាទីដើម្បីឲ្យអ្នកទទួលអារម្មណ៍ស្រស់ស្រាយឡើងវិញ ព្រមទាំងជៀសវាងមិនឲ្យមានអាការឈឺក្បាលទៀតផង។ រៀនយូរអាចធ្វើឲ្យអ្នកងាយនឹងបាត់បង់សមាធី និងងងុយផង។
4. រៀបចំកន្លែងរៀនឲ្យបានរៀបរយ និង ស្រលះ
ការរៀបចំតុសម្រាប់រៀនបានស្រលះ និងមានរបៀបពិតជាធ្វើឲ្យការសិក្សារបស់អ្នកមានប្រសិទ្ធិភាពណាស់។ ពេលតុស្រលះ អ្នកមានអារម្មណ៍ថា មានកន្លែងគ្រប់គ្រាន់សម្រាប់អ្នកសរសេរ ឬ ទុករបស់ផ្សេងៗបានប្រសើរ ជាពិសេសសៀវភៅផ្សេងៗដែលអ្នកកំពុងមើល។ ម្យ៉ាងទៀត ពេលតុមានរបៀប អ្នកមិនមានបញ្ហាក្នុងការរកសៀវភៅឬឯកសារដែលត្រូវការ ព្រោះបើតុរញ៉េរញ៉ៃ រកឯកសារមិនបាន អ្នកនឹងមានអារម្មណ៍មួរម៉ៅ ខឹង និងបាត់បង់សមាធីរៀនមួយរំពេច។
5. ចេះឲ្យរង្វាន់ដល់ខ្លួនឯង
នេះមានន័យថា អ្នកគួរកំណត់គោលដៅឲ្យបានច្បាស់ថា អ្នកត្រូវរៀនឲ្យបានចប់ប៉ុណ្ណា ហើយ សន្យាជាមួយខ្លួនឯងថា នឹងធ្វើអ្វី។ រង្វាន់ដែលអ្នកឲ្យខ្លួនឯងនៅពេលបំពេញបេសកកម្មរំឮកមេរៀនហើយនោះអាចមានដូចជា ទៅទិញអីវ៉ាន់ ទៅញ៉ាំអាហារឆ្ងាញ់ៗ ទៅមើលកុន ទៅដើរលេង ឬ ក៏ទៅញ៉ាំការ៉េម។ ធ្វើបែបនេះ អ្នកនឹងមានកំលាំងចិត្តបន្តការរៀនទៀត ព្រោះថាអ្នកដឹងក្នុងចិត្តហើយគឺបន្ទាប់ពីនេះទៅ អ្នកនឹងធ្វើអ្វី។
6. ញ៉ាំអាហារដើម្បីសុខភាព
ក្នុងរយៈពេលត្រៀមខ្លួនប្រលងនេះ អ្នកគួរញ៉ាំអាហារណាដែលជំនួយដល់រាងកាយ ជាពិសេសជំនួយខួរក្បាល និង ភ្នែក។ អ្នកមិនគួរញ៉ាំអាហារកំប៉ុង ឬ អាហារ fast food ច្រើនទេ ព្រោះវាមិនសូវល្អដល់សុខភាពប៉ុន្មាន។ គួរញ៉ាំបន្លែ និង ផ្លែឈើឲ្យបានច្រើន និងញ៉ាំអាហារឲ្យទៀងទាត់ផង។
7. សម្រាកឲ្យបានគ្រប់គ្រាន់
មិនមែនថា ខំប្រឹងរៀន អ្នកត្រូវរៀនដល់យប់ជ្រៅ ឬ ជាងពាក់កណ្តាលយប់អីនោះទេ។ ពិតណាស់អ្នកគួរបែងចែកពេលវេលាឲ្យបានល្អ ពិសេសពេលគេង ព្រោះថាបើគេងមិនគ្រប់ ពេលភ្ញាក់ឡើងមានអារម្មណ៍មិនល្អ ធីងធោង និងគ្មានសមាធិទេ។ ពេលគេងគ្រប់គ្រាន់ ក្រោកមកអារម្មណ៍ល្អ ការសិក្សាក៏ល្អដែរ។ ហេតុនេះ អ្នកគួរលៃពេលយ៉ាងណាគេងឲ្យបាន ៨ ម៉ោង ឬ យ៉ាងតិចក៍ ៦ ម៉ោងដែរ។
អត្ថបទដោយ៖ ហ៊ាង សុគន្ធារី
No comments