ចូលចិត្តញ៉ាំ​​លឿនៗ​​ណាស់​មែនទេ​​?​ តើ​​នឹង​​មាន​បញ្ហា​​អ្វី​​កើត​​ឡើង​​?​ ​

សព្វ​ថ្ងៃ ដោយ​សារ​តែ​អ្នក​មាន​ការងារ​ច្រើន ជាប់​រវល់​ខ្លាំង​​ អ្នក​ខ្លះ​សឹង​មិន​អាច​រក​ពេល​ញ៉ាំអាហារ​បាន​ត្រឹម​ត្រូវ​ផង។ ពួក​គេ​ចាប់​ផ្តើម​បង្កើត​ទម្លាប់​​ញ៉ាំអាហារ​លឿន ដើម្បី​ឲ្យ​ការងារ​របស់​គេ​ក៏​ដំណើរ​ការ​ទៅ​លឿន​ដែរ។ តែ តើ​អ្នក​ដឹង​ថា ការ​ញ៉ាំអាហារ​ប្រញាប់​ប្រញាល់​បែប​នោះ​ នឹង​អាច​ឲ្យ​អ្នក​ជួប​បញ្ហា​អ្វី​ខ្លះ? តើ​អ្នក​ជា​អ្នក​ញ៉ាំ​លឿន ឬ យឺត? ខាង​ក្រោម​នេះ​ជា​បញ្ហា​មួយ​ចំនួន​ដែល​អាច​កើតឡើង​ពេល​អ្នក​ញ៉ាំ​លឿន។

1. អ្នក​នឹង​ជួប​បញ្ហា​រំលាយអាហារ
ពេល​ញ៉ាំអាហារ​លឿន​ពេក អ្នក​នឹង​ជួប​បញ្ហា​ការ​រំលាយអាហារ ដោយ​ក្រពះ​រំលាយ​អាហារ​មិន​បាន​ល្អ។ ការ​រំលាយអាហារ​មិន​បាន​ល្អ ធ្វើ​ឲ្យ​អ្នក​មាន​អារម្មណ៍ឈឺ​ក្នុង​ក្រពះ ហើយ​ធ្ងន់​នៅ​ក្នុង​ក្រពះ ប្រៀប​ដូចបាន​ញ៉ាំ​ដុំ​ថ្ម​បែប​នោះ​ឯង។ ជួន​កាល នៅ​ពេល​ដែល​ជំងឺ​មិន​រំលាយអាហារ​កាន់​តែធ្ងន់​ធ្ងរទៅ វា​អាច​ចេញ​រោគ​សញ្ញា​ទៅជា​ដូច​មាន​ជំងឺ​បេះ​ដូង​បែប​នោះដែរ។

2. ធ្វើ​ឲ្យ​ឈឺ​ក្រពះ
ពេល​ញ៉ាំ​លឿន​ពេក ក្រពះ​របស់​អ្នក​ក៏​ធ្វើ​ការ​មិន​បាន​ល្អនោះ​ដែរ។ ដោយ​សារ​តែ​បែបនេះទើប បើ​សិនជា​អ្នក​ញ៉ាំអាហារ​លឿន ក្រោយពេល​ញ៉ាំ អ្នក​នឹង​មាន​អារម្មណ៍​ឈឺពោះ និង អារម្មណ៍​តឹង​ពោះ​ជ្រុល។ ការឈឺ​បែប​នេះ យូរៗ​ទៅ​ អាច​វិវត្តន៍​ទៅរក​ជំងឺ​ក្រពះ​ទៀត​ផង។

3. ញ៉ាំ​លឿន​ធ្វើ​ឲ្យ​​ឡើង​ទម្ងន់
តាម​ការ​ពិត ខួរ​ក្បាល និង ក្រពះរបស់អ្នក​ធ្វើ​ការជា​មួយ​គ្នា​នៅ​ពេល​អ្នក​ញ៉ាំ ទោះ​បីជា​មិន​ភ្លាមៗ​ក៏​ដោយ។ ពេល​អ្នក​ញ៉ាំអាហារ​លឿន កាឡូរី​ក្នុង​អាហារ​កើនឡើង​ឆាប់​រហ័ស ​មុន​ពេល​ដែល​រាង​កាយ​របស់​អ្នកប្រាប់​ថា វា​ត្រូវ​ការ​ថាម​ពល​ប៉ុន្មាន។ ម្យ៉ាង​ទៀត ពេល​ញ៉ាំលឿន អ្នក​ត្រូវ​ការ​ញ៉ាំ​ឲ្យ​ច្រើន​បន្ថែម​ទើប​មាន​អារម្មណ៍​ថា​ឆ្អែត​ ដែល​ជា​ហេតុ​នាំ​ឲ្យ​កាឡូរីក្នុង​ខ្លួនឡើង​ខ្ពស់ ឆាប់​ធាត់។

4. បាត់​បង់​សមត្ថភាព​បែង​ចែក​អំពី​ពេល​ឃ្លាន
ដោយ​សារ​តែ​អ្នក​ញ៉ាំលឿន ជួន​កាល​អ្នក​មិន​បាន​គិត​ពីពេល​ញ៉ាំអាហារ​ឲ្យ​បាន​ត្រឹម​ត្រូវ អ្នក​នឹង​អាច​ក្លាយ​ទៅជា​លែង​មាន​ទំនាក់​ទំនង​ទៅ​នឹង​ការ​ឃ្លាន​តាម​ធម្មតា​របស់​អ្នក។ យូរៗទៅ អ្នក​នឹង​ឈប់​មាន​អារម្មណ៍​ថា​ឃ្លាន ឬ ក៏ឆ្អែត ហើយ​អ្នក​នឹង​បែរជា​ញ៉ាំ​តាម​អារម្មណ៍​ និង ចំណង់​របស់​ខ្លួន​ទៅវិញ។ ទាំង​នេះ​ក៏​ធ្វើ​ឲ្យ​អ្នក​លែង​មាន​ពេល​ញ៉ាំអាហារ​ទៀងទាត់ អាច​ប៉ះពាល់​ដល់​ក្រពះទៀត។

5. តើ​អ្នក​គួរ​ញ៉ាំ​ដោយ​ល្បឿន​បែប​ណា?
តាម​ធម្មតា នៅ​ពេល​ញ៉ាំ ខួរក្បាល និង ក្រពះ​របស់​អ្នក​ត្រូវ​ការ​ពេល​២០នាទី ដើម្បីធ្វើ​ការ​ជា​មួយ​គ្នា ហេតុ​នេះ​អ្នក​គួរ​យ៉ាង​ហោច​ញ៉ាំ​ដោយ​ល្បឿន​នេះ​ហើយ។ វា​ប្រហែលជា​មាន​ការ​លំបាក ព្រោះ​ថា រាល់​ថ្ងៃ​ មនុស្ស​ម្នាក់​ៗ​កាន់តែ​រវល់ ហើយ​ពេល​ញាំអាហារ​ក៏​មិន​សូវ​មាន​គ្រប់​គ្រាន់ តែ​យ៉ាង​ហោច អ្នក​គួរ​សាក​ល្បង​សិន​ទៅ។

ប្រភព៖ LiveStrong
ដោយ៖ ហ៊ាង សុគន្ធារី

*ប្រសិនបើចូលចិត្តអត្ថបទនេះសូមជួយ Like និង Share ប៉ុន្តែសូមកុំ Copy យកទៅដាក់លើ Website រឺ Page​របស់ខ្លួន​ដោយ​គ្មានការ​អនុញ្ញាតិ សូមចូលរួមគោរព Copyright របស់អ្នកដទៃទាំងអស់