សញ្ញាណ​ប្រាប់​ថា​ ក្នុង​ខ្លួន​អ្នក​កំពុង​តែ​មាន​បរាសិត​

បរាសិត គឺជា​មីក្រូសារពាង្គកាយដែល​រស់​នៅ​ដោយសារសារពាង្គកាយ​មានជីវិត​ដទៃ ដូចជា​មនុស្ស​ សត្វ។ ពួក​អស់​នេះ​មានដូចជា ដង្កូវ​ពោះវៀន តេញ៉ា អៀន ព្រូន ព្រូនទំពក់។ វា​រស់​បាន​ដោយ​សារ​ការ​ជញ្ជក់​យក​សារធាតុ​ចិញ្ចឹម​ពី​ក្នុង​ខ្លួន​មនុស្ស សត្វ និង បង្ក​កំណើត​ដោយ​ពង​ទៅ​ក្នុង​ចរន្តឈាម​របស់​មនុស្ស​សត្វផង។ ពិតណាស់ នៅពេល​វា​កំពុងតែ​មាន​សកម្មភាព​នៅ​ក្នុង​ខ្លួន​របស់​យើង យើង​ប្រាកដជាទទួល​បាន​សញ្ញាមួយ​ចំនួន​ពី​ពូក​វា។ បរាសិត​នៅ​ក្នុង​ខ្លួន អាច​បណ្តាល​ឲ្យ​អ្នក​មាន​បញ្ហា​សុខភាព​មួយ​ចំនួន តែវា​អាច​ព្យាបាល​បាន​ទេ។ តែ​បើ​សិន​មិនទទួល​បាន​ការព្យាបាល​ទាន់ពេល នោះវានឹង​អាច​បង្កជាជំងឺធ្ងន់ធ្ងរ ពិបាក​ព្យាបាល។ តើ​រោគ​សញ្ញា​មាន​អ្វី​ខ្លះ? ខាង​ក្រោមជា​សញ្ញាមួយ​ចំនួន​ដែល​អាច​ប្រាប់​អ្នក​ថា អ្នក​កំពុង​មាន​បរាសិត​ក្នុងខ្លួន។

1. សញ្ញាទី​មួយ​ដែល​អ្នក​អាចជួប​ប្រទះនោះគឺ អ្នក​មាន​អារម្មណ៍​មិន​នឹងនរ និង ប្លែក​ខុស​ធម្មតា។ អ្នក​ចាប់​ផ្តើម​មាន​អារម្មណ៍ ធុញថប់​ញឹក​ញាប់ អស់​កម្លាំង តានតឹងក្នុង​អារម្មណ៍ មាន​អារម្មណ៍​ខុស​ប្លែក​ពីធម្មតា ជា​ញឹក​ញាប់។

2. អ្នក​ជួប​បញ្ហាប្រព័ន្ធ​បញ្ចញ​ចោលក្នុង​រយៈ​ថ្មីៗ​មក​នេះ។ សញ្ញាទាំង​អស់​នោះ​រួម​មាន ពិបាក​ក្នុង​ការ​បន្ទោរបង់ រាគ​ដោយ​មិន​ដឹង​មូល​ហេតុ និង ទល់លាមកជាដើម។ ជួន​កាល មាន​បញ្ហា​នឹង​ការ​ដើរ​ខ្យល់​ផងដែរ។​

3. មាន​បញ្ហា​ជំងឺ​សើ​ស្បែក ដែល​មាន​ដូចជា រោល កើត​កន្ទួល​ក្រហម ពងបែក កើត​រមាស់ ឬ ស្បែក​ស្ងួតជា​ដើម។

4. អ្នក​ក៏​អាច​មាន​បញ្ហា​សតិ​អារម្មណ៍​មួយ​ចំនួន​ដូចជា ឆាប់​ខឹង ឆាប់​ភ័យ ធ្លាក់​ទឹក​ចិត្ត ហត់ៗ ហើយជួន​កាល​ឆាប់​ភ្លេចជាដើម។

5. មួយទៀត គឺអ្នក​មាន​បញ្ហា គេង​មិន​លក់​នៅ​ពេល​យប់ ជាទូទៅគឺ​ ពិបាក​ទម្រេត​ខ្លួន​សម្រាក​ណាស់។ ជួន​កាល អ្នក​អាច​ភ្ញាក់​ច្រើន​ដង​នៅ​ពេល​យប់​ផងក៏មាន ឬ ឧស្សាហ៍​មាន​សុបិនអាក្រក់​ផង។

6. អ្នក​មាន​បញ្ហា​រឿងទម្ងន់៖ អ្នក​ចាប់​ផ្តើម ឡើង ឬ ស្រក​ទម្ងន់ លឿន​ខុសពី​ធម្មតា ទោះបីជា​របប​អាហារ​របស់​អ្នក​នៅ​ដដែល​ក៏​ដោយ។

7. អ្នក​ញ៉ាំ​មិន​ស្កប់​ស្កល់៖ ដោយ​សារ​តែ​ពួក​បរាសិតទាំង​នោះ​នៅ​ចាំ​ក្រេប​ជញ្ជក់​សារធាតុ​ចិញ្ចឹម​ពី​ក្នុង​រាង​កាយ​របស់​អ្នក អ្នក​ចាប់​ផ្តើម​កែប្រែទម្លាប់​ការ​ញ៉ាំ។ អ្នក​ចាប់​ផ្តើម​ញ៉ាំអាហារ​មិន​ងាយ​ឆ្អែត ហើយ​តែងតែ​ចង់​ញ៉ាំ​រហូត។

8. សញ្ញា​បន្ទាប់​ដែល​អាច​កើតមាន​ចំពោះ​អ្នក មាន​ដូចជា ឧស្សាហ៍ឈឺសាច់​ដុំ និង​ កន្លាក់​ដៃជើង។ ក្រៅពីនេះ អ្នក​ក៏​មាន​អារម្មណ៍ឈឺ​ចាប់​ក្នុង​បេះដូង ឬ ស្ពឹក​ដៃជើង​ផង។

បើសិនជាអ្នក​មាន​ជួប​បញ្ហាទាំងអស់​នេះ គួរទៅជួប​គ្រូពេទ្យដើម្បីពីនិត្យមើល​ឲ្យច្បាស់ និង ធ្វើ​ការ​ព្យាបាល​ឲ្យ​បាន​ទាន់ពេល។​

ប្រភព៖ Power of Positivity
ដោយ៖ ហ៊ាង សុគន្ធារី​

*ប្រសិនបើចូលចិត្តអត្ថបទនេះសូមជួយ Like និង Share ប៉ុន្តែសូមកុំ Copy យកទៅដាក់លើ Website រឺ Page​របស់ខ្លួន​ដោយ​គ្មានការ​អនុញ្ញាតិ សូមចូលរួមគោរព Copyright របស់អ្នកដទៃទាំងអស់គ្នា។