វិធី​ចិត្ត​សាស្រ្ត​ សង្កេត​កាយ​វិការ ​ដឹង​ពី​អ្វី​ដែល​គេ​កំពុង​គិត​ដោយ​ងាយ​

ជា​ការពិត​ណាស់ ក្នុង​ការ​រស់​នៅ​ប្រចាំថ្ងៃ មនុស្ស​ម្នាក់​ៗនៅ​ក្នុង​សង្គម​តែង​ត្រូវ​ការ​មាន​ការ​ប្រស្រ័យ​ទាក់​ទង​គ្នា​ទៅ​វិញ​ទៅ​មក។ តែ​ការទាក់ទង​រវាង​សង្គម​មាន​ការ​ពិបាក​ស្មាន​ណាស់ ថា​តើ​អ្នក​នោះ​កំពុង​តែ​គិត​អ្វី។ ការ​ស្រាវជ្រាវ​បាន​បង្ហាញ​ថា ​ចំពោះ​ការ​ប្រាស្រ័យ​ទាក់​ទង​គ្នា យើង​អាច​ជឿទុក​ចិត្ត​ទៅ​លើ​មនុស្ស​ណា​ម្នាក់បាន​តែ ៧% ប៉ុណ្ណោះពី​អ្វី​ដែល​គេនិយាយ ឬ​ ៣៨% នៃ​ចំពោះការ​ប្រើ​សំនៀង ឬសម្លេងក្នុងការនិយាយ​របស់​គេ។ ការ​ស្រាវជ្រាវ​បន្ត​ថា មនុស្សបង្ហាញ​ពី​ការគិត​របស់​គេប្រមាណ ៥៥% ទៅ​លើកាយ​វិការ​ដែល​គេ​ប្រើ។ តើ​អ្នក​ចេះ​មើល​កាយវិការទាំងនោះទេ?

1. ការ​អង្គុយ​គងទាក់​ខ្លា ឬ ខ្វែង​ជើង
អាកប្បកិរិយា​បែប​នេះ ​គឺ​ចង់​បង្ហាញ​ពី​ភាព​មិន​ទទួល​យក​របស់​បុគ្គល​ម្នាក់​នោះ។ ទោះ​បី​ជា​ពេល​និយាយ​ប្រាស្រ័យ​គ្នា​នោះ គេ​មាន​បង្ហាញ​ការ​ញញឹម​ក៏​ដោយ តែ​កាយ​វិការ​នេះ​បង្ហាញ​ថា​គេ​មិន​យល់​ស្រប ប្រៀប​ដូចជា​ធ្វើ​ជើង​ខ្វែង​ជា​រនាំង​ការពារ​​គំនិត​ណា​មួយ​នោះ​ ដូច្នោះ​ដែរ។ បើ​តាម​ន័យ​ចិត្ត​វិទ្យា​ កាយ​វិការ​ខ្វែង​ដៃជើង បង្ហាញ​ថា​អ្នក​នោះ​មាន​ជំងឺ​ផ្លូវ​ចិត្ត ឆាប់មាន​អារម្មណ៍ emotional ដូចនេះ​ឯង។

2. ការ​ញញឹម​ពិត​ប្រាកដ
នៅ​ពេល​អ្នក​ញញឺម មាត់​របស់​អ្នក​អាច​កុហក​គេ​បាន តែ​ភ្នែក​របស់​អ្នក​មិន​អាច​កុហក​បាន​ទេ។ ភាគ​ច្រើន មនុស្ស​ម្នាក់​ៗ​តែង​ញញឹម​ដើម្បី​លាក់​ពី​ការ​គិត និង អារម្មណ៍​របស់​ពួក​គេ។ ពេល​ក្រោយ បើ​អ្នក​ចង់​ដឹង​ថា អ្នក​នោះ​ញញឺម​ពិត​ប្រាកដ ឬ មាន​លាក់​បាំង​អ្វី​មួយ អ្នក​គួរ​មើល​ភ្នែក​ពួក​គេ។ បើនៅកន្ទុយ​ភ្នែក​ពួក​គេ​ស្ងួត គ្មាន​មានលក្ខណៈ​រំភើប​អ្វីទេ នោះ​ពួកគេ​ញញឹម​លាក់​បាំង​ហើយ។

3. ធ្វើ​កាយ​វិការ​ដូចអ្នក
តើ​អ្នក​ធ្លាប់​ជួប​នរណា​ម្នាក់ ហើយ​គេ​ធ្វើកាយ​វិការ​តាម​អ្នក​រហូត​ទេ? ជួន​កាល​អ្នកឱនទៅ​មុខពេល​កំពុង​និយាយ​គ្នា ហើយ​បន្តិច​គេក៏​ធ្វើ​ដូចជា​អ្នក​ដែរ។ កាយ​វិការ​នេះ​បង្ហាញ​ថា ការ​សន្ទនា​របស់​អ្នក​មាន​ភាព​ប្រសើរ​ហើយ។ វា​ប្រៀបដូចជា​សញ្ញា​មួយ​បង្ហាញ​ថាអ្នក​ទាំង​ពីរ​មាន​អារម្មណ៍​ប្រហាក់ប្រហែល​គ្នា។ ពួក​គេ​កំពុង​តែ​ចុះ​សម្រុង​គ្នាហើយ។​

4. គេចពីការប្រទាក់កែវភ្នែក
ភាគច្រើន មនុស្ស​ទូទៅ​ជឿថា នៅ​ពេល​ដែល​អ្នក​ណា​ម្នាក់​កុហក ពួក​គេ​មិន​អាច​មើល​ភ្នែក​អ្នក​ចំ​បាន​យូរទេ។ ជួន​កាល អ្នក​ខ្លះ ក៏​ធ្វើ​ផ្សេង​ពី​នេះ ដោយ​ការ​ព្យាយាម​សំលឹង​ភ្នែក​គេ​ឲ្យ​ចំ​ ពេល​និយាយ​កុហក ដោយ​ចង់​ឲ្យ​គេ​ជឿ​យើង។ តាម​ការពិត បើ​សិនជា​អ្នក​និយាយ​ជា​មួយ​អ្នក​ណា​ម្នាក់​ដែល​ប្រឹង​សំលឹង ដោយ​មិន​ព្រិច​ភ្នែក​នោះ គេ​កុហក​អ្នក​ហើយ។ កែវ​ភ្នែក​ប្រាប់​បាន​ច្រើន​ណាស់ពី​ការ​កុហក។

5. ញាក់​ចិញ្ចើម
តាម​ការ​ពិត នៅពេល​គេ​បញ្ចេញ​កាយវិការ​ញាក់​ចិញ្ចើម គេ​មានអារម្មណ៍​បី​យ៉ាង ភ្ញាក់ផ្អើល ព្រួយបារម្ភ និង ភ័យ​ខ្លាច។

6. ងក់ក្បាល​ជាប់​រហូត
នៅ​ពេល​អ្នក​និយាយ​ប្រាប់​អ្នក​ណា​ម្នាក់​ពី​រឿង​អ្វី​មួយ ហើយ​ពួក​គេ​ងក់​ក្បាល​ទទួល​យក​ភ្លាម​ៗ​បែប​នោះ នេះ​មាន​ន័យ​ថា អ្នក​នោះបារម្ភ​អំពី​ការ​គិត​របស់​អ្នក​ទៅ​លើ​គេ​ទៅ​វិញទេ មិន​មែន​ជា​ការយល់ព្រម​ឡើយ។

7. ខាំ​ធ្មេញ បង្ហាញពី​អារម្មណ៍​ស្ត្រេស
ពេល​មួយ​ដែល​អ្នក​ណា​ម្នាក់​ចាប់​ផ្តើម​​ខាំ​ធ្មេញ ឬ ខាំថ្គាម​ឲ្យណែន ឬ តឹង​សរសៃរ​ក អ្នក​នោះ​ពិត​ជា​មាន​អារម្មណ៍​ស្ត្រេស​ច្បាស់​ណាស់។ ទោះ​បី​ជា​ពួកគេ​និយាយ​អីក៏​ដោយ គេ​នៅ​តែ​មាន​អារម្មណ៍​មិន​ស្រួល​ក្នុង​ចិត្ត ច្របូល​ច្របល់​ដែរ។

ប្រភព៖ Tatentsmart
ដោយ៖​ ហ៊ាង សុគន្ធារី

*ប្រសិនបើចូលចិត្តអត្ថបទនេះសូមជួយ Like និង Share ប៉ុន្តែសូមកុំ Copy យកទៅដាក់លើ Website រឺ Page​របស់ខ្លួន​ដោយ​គ្មានការ​អនុញ្ញាតិ សូមចូលរួមគោរព Copyright របស់អ្នកដទៃទាំងអស់